Myrstankelbein (Tipula paludosa) er rekna som eit skadedyr som har ein generasjon i året. Myrstankelbein trivst godt med kjølege somrar, milde vintrar og mykje nedbør (> 600 mm). Etter klekking i juli-august legg hoene opptil 400 egg i grasmark. Desse utviklar seg til larvar innan 14 dagar. Hoene døyr nokre få dagar etter egglegginga.
Larvane bevegar seg i tunnelar i øvre jordlag og lever i stor grad på planterøter. Størst skade oppstår i løpet av våren det neste året (mai- juni), før larvane forpuppar seg i slutten av juni.
Angrepet viser seg ofte som glisen eng med graslause flekkar. Ein kan lett mistenkje at dei kvite flekkane er overvintringsskadar.
Bekjemping
Det er veldig vanskeleg å bekjempe myrstankelbein med kjemiske, mekaniske og biologiske tiltak. I dei fleste tilfelle vil det løne seg å ta ein tidleg førsteslått. Etterpå kan ein vurdere tiltaka på skadde areal (fullt gjenlegg/isåing). Larvane er aktive fram til slutten av juni, og det er tryggast å vente til dei har forpuppa seg før ein sår i enga. Dersom ein ikkje har tid til å vente og vil fornye enga så fort som mogeleg, kan jordarbeiding med djup pløying før harving, såing og tromling, gå bra. Vi rår likevel ifrå isåing i mai sidan, larvane kan angripe dei nye frøspirane!
